Divine Protection


由於某些不知所謂的妖孽能量繼入侵hermit mama fb page之後又入侵本blog,妖氣衝天,再要搵堆arcturians and divine beings來幫宅媽捉邪捉鬼!

Advertisements
Posted in be

宅媽分享<探B的禮儀>

JAY_5649

幾年前我寫過<分手的禮儀>,今天我想寫探B的禮儀。

1. 人地個B出世後第一個月盡量不探B。因為人地亞媽生完攰到癲(尤其全母乳媽媽),唔得閒招呼你地一個二個,同埋你黎到唔理你又唔係,理你一陣掛住講攪到亂哂schedule又塞奶又谷奶就大鑊。要有自知之明,認清自己的身份和地位,除非你係對方最親最親的親人或有實際功能可以offer help(例如你是lactaction consultant又或者具有陪月/輔導功能)或者對方主動邀請,否則,想探B就遲d先,最好過埋100日先。。。

2. 滿月前咪探B另一原因是NEW BORN抵抗力有限,亞媽的細菌尚可work out到,但外人帶來的細菌是絕對不受歡迎,唔該咪以為自己無病無痛就等於無菌,常識話你知成條街同你成個人都有菌。

3. 唔該一入屋就用消毒梘液洗手或在街掂B前at least用消毒濕紙巾抹手。同埋唔該咪洗完手後用你條褲來抹手,常識話我知咁係等於無洗過。在街洗完手後你掂過廁所門柄或㩒過LIFT的話唔該再消過毒。

4. 千祈咪錫new born。都話你係細菌來源,而你d口水如果有菌的話更係highly contagious。而男生們,你的鬚根請勿掂到個B塊面,baby女生如果你長頭髮請張之紥起,這些都是newborn幼嫩皮膚的「刺激物」。

5. 同bb影相不能開閃光燈是常識。而這常識請銘記於心。

6. 探B時間要盡量遷就人地亞媽同個B的schedule。人地個B的nap hours你千祈咪去攪住人,事關人地亞媽可能已經幾日幾夜無訓而個B nap hours係佢唯一有機會攤吓的時間。擾亂人地的schedule,係死罪。因為個B一覺訓得衰或被disrupt schedule的aftermath係可能佢成晚都會發癲。你咁攪一攪,人地亞媽分分鐘為咗招呼你之後就要通頂。

7. 如果人地有一大一小,唔該㩒一㩒自己對小baby的hyper,先對大孩子打招呼。Sibling rivalry 有就梗架嘞。請sensitive一點,不要加重大孩子被left out的感覺。

8. 去探人之前可以的話請問一問人地亞媽有無特別嘢想食或需要買,尤其嗰d無人無物無工人的亞媽。你如此問一問可能對對方來說簡直有如天使降臨。

9. 見到人地個B, 除非是讚美說話,否則煩請收吓把口,咪對個B咁多comments或評頭品足,或者俾d unsolicited advice 企圖教人湊仔。父母,尤其是新手父母,尤其尤其是新手媽媽,對自己孩子的評語是超級sensitive的。可以的話,盡可能將焦點放在人地亞媽身上,關心一下她的狀況,instead of 啫住個B唔放。 當然,關心人地亞媽唔係叫你問人打算幾時修身之類會引起嚴重不安的問題。

10. 如果個B仍是100日之內,make your visit short 。一個鐘左右好徹退。都係嗰句,人地亞媽好攰。如果你係經驗媽媽有功能作用又唔同,去到幫人湊住個B兩三粒鐘(如果個B肯跟),俾人地亞媽訓個晏覺或放風落街食個tea或行個圈,我話你聽,呢個舉動足以令人地亞媽感激你一世。

(後按:多謝carol提醒,追加11.探b請勿搽香水。)
(後按2:
都話common sense一d都唔common。覺得探new born無需特別注意衛生的,一係無常識,一係唔係父母。
講緊new born, NEW BORN呀!
你唔覺得人地亞媽有責任保護自己的新生兒而將要你注意基本個人衛生說成無家教又潔癖又盛,只代表閣下自身品格或常識之問題,我都覺得人地亞媽大條道理唔歡迎你,你亦最好不要周圍害人,個b無你去探簡直幸運中之幸運。
不過,講到尾,我講緊嘅係禮儀,無品嘅人又點會睇得明呢?呢d好明顯係嗰堆傷風感冒都唔會覺得自己要戴口罩周圍打乞嗤咳又唔cover個口的毫無公德自私精。
世界上,無品無常識的人多到超乎常人可接受範圍,尤其是香港。)
(後按3:有人問都唔問擺咗篇<探b的禮儀>上高登,然後又話「怪獸家長是如何練成」乜乜乜。。。
香港呢個地方,真係無得救,鍾意乜都label,又怪獸家長又港女又毒L。。。唉。。。所以呢,有網媒想找我合作我都推哂,層次不同都係慳返啖氣。。。)

Posted in be